सातारा : येथील डॉ. स्नेहल माने-जगताप यांनी स्त्री रोग व प्रसूतिपूर्व उपचार पद्धती (गायनाकॉलॉजी) या विषयामध्ये (एमएस) ही पदव्युत्तर पदवी प्राप्त केली आहे. त्याबद्दल गौरीशंकर संस्थेच्या वतीने संस्थेचे प्रशासकीय अधिकारी नितीन मुडलगीकर यांच्या हस्ते डॉ. स्नेहल माने जगताप यांचा सत्कार करण्यात आला.
डॉ. जगताप यांनी वैद्यकीय क्षेत्रात विशेष प्रावीण्य प्राप्त केले आहे. औरंगाबाद येथील शासकीय वैद्यकीय महाविद्यालयामधून त्यांनी ‘एमबीबीएस’ची पदवी प्राप्त करून संपूर्ण राज्यात सातवा क्रमांक व महाविद्यालयीन स्तरावर प्रथम क्रमांक प्राप्त केला. तसेच स्त्री-रोग व प्रसूतिपूर्व उपचार पद्धतीतील विविध शोधनिबंधांची वैद्यकीय क्षेत्रातील तज्ज्ञांनी दखल घेऊन जगताप यांना गौरविले आहे. वैद्यकीय क्षेत्रासोबतच त्यांनी क्रीडा क्षेत्रातही भरीव कामगिरी केली आहे. बास्केटबॉल व कराटे क्रीडा प्रकारात त्यांनी राज्यस्तरीय संघात स्थान प्राप्त केले होते. वैद्यकीय क्षेत्रातील अद्ययावत शिक्षणाचा लाभ सातारकरांना देण्याचा त्यांचा मानस असून, भविष्यात ‘टेस्ट ट्यूब बेबी’वर संशोधनात्मक कार्य करण्याचा निर्धार त्यांनी केला आहे.
या वेळी गौरीशंकर संस्थेचे चेअरमन मदन जगताप, जनसंपर्क अधिकारी श्रीरंग काटेकर, चेअरमन मिलिंद जगताप, संचालक डॉ. अनिरुद्ध जगताप, डॉ. संजय कारंडे, डॉ. प्रताप गोळे, डॉ. सुरेश चव्हाण, डॉ. सुनील शेलार, डॉ. चैतन्य ठोके, डॉ. अभिषेक महाजन, डॉ. आदित्य महाजन, डॉ. विक्रांत महाजनी, डॉ. प्रमोद कुचेकर, डॉ. चैतन्य बोकील उपस्थित होते.
कार्यक्रमामध्ये डॉ. स्नेहल माने-जगताप यांच्या उज्ज्वल यशाबद्दल सर्वांनी अभिनंदन केले.